Xalq deputatlari Termiz shahar Kengashi kotibiyati mudiri, deputat A.Ashurov hamda kotibiyat bosh mutaxassisi A.Temirovlar 25-“Kokildorota” saylov okrugi deputati M.Sidiqova “Alisher Navoiy” mahallasida bo‘lib, imtiyozli kreditlar hisobidan amalga oshirilgan loyihalar samaradorligini o‘rgandilar.

Amaliy o‘rganish davomida O‘zbekiston Respublikasining 2012-yil 26-apreldagi “Oilaviy tadbirkorlik to‘g‘risida”gi O‘RQ-327-sonli Qonuni ijrosi, shuningdek, hokim yordamchisi tavsiyasi asosida ajratilgan imtiyozli kreditlarning maqsadli va samarali foydalanilishi tahlil qilindi.

O‘rganish jarayonida mahalla fuqarolari K.Jovliyev hamda T.Normurodova tomonidan amalga oshirilgan loyiha alohida e’tirof etildi.

Kredit miqdori: har bir fuqaroga issiqxona faoliyatini yo‘lga qo‘yish uchun 50 million so‘mdan imtiyozli kredit ajratilgan.
Amaliy natija: ajratilgan mablag‘lar hisobidan mahalla hududidagi 14 sotix yer maydonida zamonaviy issiqxona barpo etilib, serdaromad ekinlar yetishtirilmoqda.
Samaradorlik: loyiha natijasida oilalar uchun barqaror daromad manbai yaratilishi bilan birga, aholi bandligini ta’minlash va oilaviy tadbirkorlikni rivojlantirishga amaliy zamin yaratilgan.

Bunday loyihalar imtiyozli kreditlarning manzilli, maqsadli va samarali yo‘naltirilishi aholi farovonligini oshirish hamda tadbirkorlik tashabbuslarini qo‘llab-quvvatlashda muhim ahamiyat kasb etayotganini ko‘rsatadi.