Hududlardagi mavjud masala va muammolarni hal etish- aholiga qulay sharoitlar yaratishda, hududlar qiyofasini yanada yaxshilashda muhim ahamiyat kasb etadi. Bu borada xalq deputatlari mahalliy Kengashlardagi deputatlarning joylarda olib borayotgan o‘rganishlari va turli muammolarga yechim topishga ko‘maklashayotgani e’tiborga molik.

Xalq deputatlari Mirzo Ulug‘bek tumani Kengashining Qurilish, kommunal, suv xo‘jaligi, ekologiya, sanoat va transport masalalari bo‘yicha doimiy komissiyasi sessiyaga ko‘chalarga asfalt yotqizish yuzasidan kiritilgan masalani o‘rganish maqsadida “Alisherobod” hamda “Zakovat” mahallalariga amaliy tashrif buyurdi. Ushbu o‘rganish tadbirida Kengash huzuridagi ekspertlar guruhi a’zolari ham ishtirok etdilar.

Deputatlar hududlarga chiqib, mahallalardagi ichki yo‘llarning holati bilan tanishdilar. O‘rganish davomida yo‘l qoplamalarining holati ko‘rib chiqilib, fuqarolar bilan muammoli holatlar yuzasidan suhbatlar o‘tkazildi.

Mazkur ishlar fuqarolar murojaatlarida ko‘tarilgan yo‘l muammolarini bartaraf etishga qaratilgan bo‘lib, ichki yo‘llarning holatini yaxshilash, transport qatnovi xavfsizligini ta’minlash hamda aholi turmush sifatini oshirishga xizmat qiladi.

O‘rganish tadbirlarida Kengash kotibiyati bosh mutaxassisi Gulchexra Azizova ham ishtirok etdi.