48-СОНЛИ МАКТАБДА ОЛИБ БОРИЛАЁТГАН РЕКОНСТРУКЦИЯ ИШЛАРИ ЎРГАНИЛДИ
Ўзбекистон Республикаси Президентининг 2025 йил 27 декабрдаги «2026–2028 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида»ги ПҚ–393-сонли қарорига мувофиқ, Янгиқўрғон туманидаги 48- ва 56-сонли умумий ўрта таълим мактабларида реконструкция ва бунёдкорлик ишлари амалга оширилмоқда.
Халқ депутатлари Янгиқўрғон тумани Кенгаши котибияти мудири Эргашева Мунисхон Рустамбековна томонидан 48-сонли умумий ўрта таълим мактабида олиб борилаётган қурилиш ва реконструкция ишларининг бугунги ҳолати жойига чиққан ҳолда ўрганилди.
🔹 48-сонли умумий ўрта таълим мактабида 6 миллиард сўм маблағ эвазига кенг кўламли қурилиш ва таъмирлаш ишлари амалга оширилмоқда.
Лойиҳа доирасида мактабнинг 180 ўринли мавжуд биноси реконструкция қилиниб, қўшимча равишда яна 180 ўринли янги ўқув биноси барпо этилди.
Ўрганиш давомида қурилиш-монтаж ишларининг сифати, лойиҳа талабларига мувофиқлиги, ички ва ташқи пардозлаш ишларининг ҳолати, шунингдек, мактаб ҳудудини ободонлаштириш масалаларига алоҳида эътибор қаратилди.
Мазкур бунёдкорлик ишларининг амалга оширилиши натижасида мактабнинг ўқув қуввати сезиларли даражада оширилиб, ўқувчи-ёшларнинг замонавий ва муносиб шароитларда таълим олиши учун қўшимча имкониятлар яратилмоқда.
Шунингдек, қурилиш ва реконструкция ишларини белгиланган муддатларда, сифатли ҳамда лойиҳа-смета ҳужжатлари талаблари асосида якунлаш, объектни Ватанимиз мустақиллигининг 35 йиллиги ва янги 2026/2027 ўқув йили арафасида фойдаланишга тайёр ҳолатга келтириш муҳимлиги таъкидланди.
Олиб борилаётган ишлар белгиланган тартибда назорат ва ўрганишда давом эттирилади.