Ko‘p qavatli uylar holati o‘rganilgandan so‘ng, Xalq deputatlari Termiz shahar Kengashi raisi, deputat D.Normuradova, Kengash kotibiyati mudiri, deputat A.Ashurov, Kengashning 21-“Jo‘yjangal” saylov okrugi deputati G.Xudaykulova hamda kotibiyat bosh mutaxassisi R.Mamashukurov “Amu sohillari” mahallasida yangi tashkil etilayotgan tadbirkorlik subyektlari faoliyati bilan tanishdilar.

💬O‘rganish davomida mahallada tadbirkorlik faoliyatini boshlayotgan fuqarolarga yaratilayotgan imkoniyatlar, imtiyozli kredit mablag‘laridan foydalanish samaradorligi hamda yangi ish o‘rinlari yaratish borasidagi ishlar ko‘zdan kechirildi.

💬Xususan, mahalla fuqarosi G.Salomova o‘z tadbirkorlik faoliyatini yo‘lga qo‘yish maqsadida 10 million so‘m miqdorida imtiyozli kredit mablag‘i olib, go‘zallik saloni tashkil etgani qayd etildi.

💬Shuningdek, “NODIRABEGIM” atelyesi faoliyati bilan yaqindan tanishdilar.

💬Tanishuv davomida tadbirkorlik subyektining faoliyati, ko‘rsatilayotgan xizmatlar, yaratilgan shart-sharoitlar hamda kelgusidagi rejalar haqida ma’lumotlar olindi. Shuningdek, yangi tashkil etilgan biznes faoliyatini yanada rivojlantirish, xizmatlar turini kengaytirish va qo‘shimcha ish o‘rinlari yaratish imkoniyatlari yuzasidan fikr almashildi.

💬Bunday tashabbuslar mahallalarda aholi bandligini ta’minlash, xotin-qizlarning tadbirkorlik faoliyatini qo‘llab-quvvatlash, oilalar daromadini oshirish va yangi ish o‘rinlarini yaratishda muhim ahamiyat kasb etadi.

🫥Deputatlik nazorati davomida nafaqat mavjud muammolar, balki fuqarolarning tashabbuslari va ularni qo‘llab-quvvatlash imkoniyatlariga ham alohida e’tibor qaratilmoqda.