Shu maqsadda Xalq deputatlari Termiz shahar Kengashi raisi, deputat D.Normuradova, Kengash kotibiyati mudiri, deputat A.Ashurov hamda kotibiyat bosh mutaxassisi A.Temirov Kengashning 14-“Bog‘zor” saylov okrugi deputati O.Sharofutdinova saylov okrugiga qarashli “Bog‘zor” mahallasida bo‘lib, Kengash sessiyasi kun tartibiga kiritilayotgan masalalar yuzasidan nazorat-tahlil tadbirini olib bordilar.
Nazorat-tahlil tadbiri davomida mahallada jamoat xavfsizligini ta’minlash, huquqbuzarliklarning barvaqt oldini olish, fuqarolar osoyishtaligini ta’minlash hamda profilaktika inspektori tomonidan amalga oshirilayotgan ishlarning samaradorligiga alohida e’tibor qaratildi.
Xususan, O‘zbekiston Respublikasining 2014-yil 14-maydagi O‘RQ-371-sonli “Huquqbuzarliklar profilaktikasi to‘g‘risida”gi Qonuni doirasida tuzilgan savolnoma asosida profilaktika inspektorining bugungi kundagi xizmat faoliyati yuzasidan batafsil suhbat olib borildi.
Suhbat davomida mahallada huquqbuzarlik va jinoyatlarning oldini olish, huquqbuzarlik sodir etishga moyil bo‘lgan shaxslar bilan profilaktik ishlarni tashkil etish, nazoratdagi shaxslar bilan ishlash, oilaviy nizolar va boshqa ijtimoiy muammolarni barvaqt aniqlash hamda ularning oldini olish borasida amalga oshirilayotgan ishlar yuzasidan tegishli ma’lumotlar olindi.
Mahalla hududini kameralashtirish masalasiga ham alohida e’tibor qaratildi. Profilaktika inspektorining hududdagi jamoat xavfsizligini yanada mustahkamlash, kuzatuv kameralari o‘rnatilishi lozim bo‘lgan nuqtalarni aniqlash hamda videokuzatuv tizimini takomillashtirish yuzasidan takliflari tinglandi.
Shuningdek, mahalladagi xavf-xatarlarni tahlil qilish, huquqbuzarlik sodir etilishi ehtimoli yuqori bo‘lgan hududlarni aniqlash va bunday joylarda profilaktik choralarni kuchaytirish masalalari ham muhokama qilindi.
Deputatlar tomonidan profilaktika inspektorining mahalla faollari va tegishli tashkilotlar bilan hamkorligini yanada kuchaytirish, fuqarolar murojaatlari va hududdagi mavjud muammolarga e’tibor qaratish, huquqbuzarliklarning sabab va shart-sharoitlarini barvaqt aniqlash hamda ularni bartaraf etish bo‘yicha tegishli tavsiya va takliflar bildirildi.
Nazorat-tahlil tadbirining asosiy maqsadi — mahallada huquq-tartibotni mustahkamlash, fuqarolarning tinch va xavfsiz hayot kechirishlari uchun zarur shart-sharoitlarni ta’minlash hamda huquqbuzarliklarning oldini olish borasidagi ishlar samaradorligini oshirishdan iborat.
Tadbir davomida bildirilgan taklif va mulohazalar Kengash sessiyasi kun tartibiga kiritilayotgan masalalarni ko‘rib chiqishda hamda keyingi deputatlik nazoratini amalga oshirishda inobatga olinadi.