Xalq deputatlari Sardoba tumani Kengashi kotibiyati mudiri Q.O‘tayev, kotibiyat mutaxassislari S.Nomozov va L.Toshquvvatovlar, shuningdek, doimiy komissiya raislari A.Muhamadiyev, E.Nazarov hamda komissiya a’zolari ishtirokida joriy yil iyul oyida bo‘lib o‘tadigan navbatdagi sessiyaga kiritilishi rejalashtirilgan kun tartibidagi masalalar atroflicha ko‘rib chiqildi.
Uchrashuv davomida har bir masalaning mazmun-mohiyati, ijtimoiy ahamiyati hamda qabul qilinishi kutilgan qarorlarning ijrosini ta’minlashga qaratilgan jihatlar yuzasidan fikr almashildi. Shuningdek, sessiya muhokamasiga taqdim etiladigan hujjatlarni belgilangan tartibda rasmiylashtirish va tayyorlash masalalari muhokama qilindi.
Yig‘ilishda deputatlarning xizmat faoliyatida muhim ahamiyatga ega bo‘lgan “Deputat yon daftarchasi”ni yuritish tartibiga alohida e’tibor qaratildi.
Unda fuqarolar murojaatlarini qayd etish, ularning ijrosini nazorat qilish, saylovchilar bilan uchrashuvlar natijalarini aks ettirish hamda deputatlik faoliyatiga oid ma’lumotlarni huquqiy talablar asosida rasmiylashtirish tartibi yuzasidan atroflicha huquqiy tushuntirishlar berildi.
Mazkur ishlar xalq deputatlari mahalliy Kengashlari faoliyatining ochiqligi va samaradorligini yana-da oshirish, deputatlik nazoratini kuchaytirish hamda aholi murojaatlari bilan ishlash sifatini yuksaltirishga xizmat qiladi.