Xalq deputatlari Bo‘stonliq tumani Kengashining 2026-yilga mo‘ljallangan ish rejasiga muvofiq O‘zbekiston Liberal demokratik partiyasidan saylangan deputat M.Mirabdullayev tumanning “Besh-tut” mahallasida aholi murojaatlarini "mahalla yettiligi" xodimlari ishtirokida “ko‘chabay” o‘rgandi. O‘rganish davomida fuqarolar o‘zlari istiqomat qilayotgan hudud yaqinida olib borilayotgan qurilish ishlari sababli yuzaga kelayotgan shovqin hamda chang aholiga noqulaylik tug‘dirayotgani, bu esa ayniqsa yoshi ulug‘ insonlar va bolalar salomatligiga salbiy ta’sir ko‘rsatishi mumkinligi haqida murojaat qilishdi.

Murojaat yuzasidan Ekologiya inspeksiyasi mas’ul xodimlari ham jalb qilinib, qurilish ishlarining atrof-muhitga ta’siri, havoga tarqalayotgan chang miqdori va uning aholi yashash hududiga tarqalish holati maxsus tartibda tekshirildi. Tekshiruv natijalariga ko‘ra, chang zarralarining aholi xonadonlariga zarar yetkazish darajasida yetib bormayotgani aniqlanib, quruvchilarga qurilish ishlari davomida sanitariya-ekologiya talablariga qat’iy rioya etish, chang ko‘tarilishining oldini olish uchun hududni muntazam namlash, qurilish materiallarini belgilangan tartibda saqlash hamda shovqin darajasini imkoni qadar kamaytirish yuzasidan tegishli tavsiyalar berildi.

Shuningdek, qurilish ishlarini amalga oshirishda qonunchilikda belgilangan ekologik va sanitariya me’yorlariga to‘liq amal qilish, fuqarolarning tinch va xavfsiz yashash muhitiga salbiy ta’sir ko‘rsatmaslik, qo‘shni aholi manfaatlarini inobatga olish hamda kelgusida bunday holatlarning oldini olish bo‘yicha zarur choralarni ko‘rish lozimligi ta’kidlandi.