Xalq deputatlari Bo‘stonliq tumani Kengashining 2026-yilga mo‘ljallangan ish rejasiga muvofiq O‘zbekiston Xalq demokratik partiyasidan saylangan deputat J.Sadirov va kotibiyat xodimi M.Tursunbayeva tomonlaridan tuman Tibbiyot birlashmasiga qarashli ko‘p tarmoqli markaziy poliklinika faoliyati o‘rganilib, aholiga ko‘rsatilayotgan tibbiy xizmatlar sifati, bemorlarga yaratilayotgan sharoitlar hamda sog‘liqni saqlash sohasida raqamli texnologiyalarni joriy etish bo‘yicha amalga oshirilayotgan ishlar tahlil qilindi.

O‘rganish davomida poliklinikada aholini qabul qilish tizimi, shifokorlar faoliyati, tor mutaxassislar tomonidan ko‘rsatilayotgan tibbiy xizmatlar, tashxis qo‘yish va davolash jarayonlari, navbatlarni tashkil etish, sanitariya-gigiyena talablariga rioya qilinishi hamda bemorlar uchun yaratilgan qulayliklarga alohida e’tibor qaratildi.

Shuningdek, muassasada raqamlashtirish jarayonlari, xususan, elektron tibbiy kartalarni yuritish, elektron navbat tizimi, onlayn ro‘yxatdan o‘tish, elektron retseptlardan foydalanish, tibbiy ma’lumotlarni axborot tizimlari orqali shakllantirish va saqlash hamda tibbiyot xodimlarining raqamli platformalar bilan ishlash ko‘nikmalari ham o‘rganildi.

O‘rganish yakunida aholi salomatligini muhofaza qilish, tibbiy xizmatlar sifatini oshirish, raqamli tibbiyot imkoniyatlarini keng joriy etish va fuqarolar uchun zamonaviy, tezkor hamda shaffof tibbiy xizmatlarni tashkil etish bo‘yicha ishlarni izchil davom ettirish bo‘yicha tavsiyalar berildi.