Xalq deputatlari Chilonzor tuman Kengashining 7-Oqtepa saylov okrugi deputati Mamatqulov Ilhom Abdurashidovichga biriktirilgan kotibiyat bosh mutaxassisi H. Mirzayeva tomonidan Oqtepa mahallasi hududidagi ichki ko‘chalarning holati joyiga chiqqan holda o‘rganildi.
O‘rganish jarayonida mahalla raisi hamda aholi vakillari bilan suhbat o‘tkazildi. Ularning ma’lum qilishicha, mahalladagi 1, 2, 3, 4, 5, 6 va 7-uylar oldidagi ichki ko‘chalar avval sement-beton qoplamasi bilan ta’mirlangan. Biroq qish mavsumidagi anomal sovuq hamda muzlamaga qarshi sepilgan tuzlar ta’sirida beton qoplamaning sifati yomonlashgan. Natijada beton tarkibidagi mayda shag‘allar yer yuzasiga chiqib qolgan bo‘lib, bu piyodalar harakati uchun noqulaylik tug‘dirmoqda va aholi tomonidan mazkur holat yuzasidan tez-tez murojaatlar kelib tushmoqda.
Aniqlangan muammolar yuzasidan tegishli ma’lumotlar deputat Ilhom Mamatqulovga yetkazildi. Mazkur masalani ijobiy hal etish hamda ichki ko‘chalarni ta’mirlash bo‘yicha zarur choralarni ko‘rish yuzasidan tegishli ishlar belgilandi.