Xalq deputatlari Muzrabot tumani Kengashi kotibiyatining kunlik ish rejasiga muvofiq mahallalarda deputatlik nazorati tadbirlari izchil davom ettirilmoqda.
Navbatdagi o‘rganish Xalq deputatlari Muzrabot tumani Kengashiga 6-“Duoba” saylov okrugidan saylangan deputat Qorakulov Ravshan Usmonovich, tuman Kengashi kotibiyati mudiri D. Sherboyev hamda kotibiyat bosh mutaxassisi Sh. Shoymardonov ishtirokida “Duoba” mahallasida o‘tkazildi.

Deputatlik nazorati davomida mahalladagi “mahalla yettiligi” faoliyati tizimli tahlil qilinib, aholi bandligini ta’minlash, kambag‘allikni qisqartirish, yoshlar va xotin-qizlar bilan ishlash, ijtimoiy-ma’naviy muhitni mustahkamlash hamda fuqarolarga ko‘rsatilayotgan davlat xizmatlari sifati yuzasidan amalga oshirilayotgan ishlar o‘rganildi.

Shuningdek, mahalladagi ichki yo‘llar, ichimlik suvi, elektr ta’minoti, obodonlashtirish va ko‘kalamzorlashtirish ishlari joyiga chiqib ko‘zdan kechirildi. Aholi bilan ochiq muloqotlar o‘tkazilib, fuqarolar tomonidan bildirilgan taklif va murojaatlar tinglandi hamda aniqlangan muammolarni hal etish bo‘yicha mas’ul tashkilotlarga tegishli vazifalar belgilandi.

O‘rganish jarayonida mahalliy Kengash deputatlari faoliyatining 24 ta ustuvor yo‘nalishi doirasida hududda olib borilayotgan ishlarning samaradorligi ham baholanib, mavjud imkoniyatlardan yanada unumli foydalanish, aholini qiynayotgan muammolarni tezkor bartaraf etish va mahalla infratuzilmasini yanada yaxshilash yuzasidan amaliy tavsiyalar berildi.