O‘zbekiston Respublikasi Prezidentining 2025-yil 8-oktabrdagi PQ–298-son qarori ijrosini ta’minlash maqsadida Muzrabot tumanining "Yangi diyor" mahallasida amalga oshirilayotgan bunyodkorlik va obodonlashtirish ishlari deputatlik nazorati asosida muntazam o‘rganilmoqda.

Shu munosabat bilan Xalq deputatlari Muzrabot tumani Kengashiga 13-"Shabada" saylov okrugidan saylangan deputat Muxammadiyeva Barchin Hazratqulovna hamda tuman Kengashi kotibiyati bosh mutaxassisi Xoliqov Bahodir ishtirokida mahallada nazorat-tahlil tadbiri o‘tkazildi.

O‘rganish davomida loyiha doirasida barpo etilayotgan 1,14 kilometr uzunlikdagi piyodalar yo‘lagi qurilishining borishi ko‘zdan kechirildi. Qurilish ishlari MAKON BIZNES-ANGOR MCHJ tomonidan amalga oshirilayotgan bo‘lib, ayni paytda piyodalar yo‘lagini betonlash ishlari davom etmoqda.

Deputat tomonidan qurilish ishlarining sifati, loyiha talablariga muvofiqligi, qurilish materiallarining belgilangan standartlarga javob berishi, mehnat xavfsizligi qoidalariga rioya etilishi hamda ishlarning tasdiqlangan jadval asosida olib borilishi atroflicha tahlil qilindi.

Nazorat yakunida pudratchi tashkilot mas’ullariga qurilish sifatini yanada oshirish, aniqlangan kamchiliklarni tezkor bartaraf etish, ishlar sur’atini jadallashtirish hamda obyektni belgilangan muddatda foydalanishga topshirish yuzasidan tegishli tavsiya va ko‘rsatmalar berildi.