ХЎЖАШЎРКЕНТ МАҲАЛЛАСИДА ХОНАДОНЛАР ЎРГАНИЛДИ
Халқ депутатлари Янгиқўрғон тумани Кенгаши котибияти мудири Эргашева Мунисхон Рустамбековна ҳамда туман Кенгашининг 9-Хўжашўркент сайлов округи депутати Темирова Феруза Алиакбаровна томонидан Хўжашўркент маҳалласида кўчама-кўча ва хонадонбай ўрганишлар олиб борилди.
Ўрганиш жараёнида аҳоли хонадонларида томорқа ерларидан унумли ва самарали фойдаланиш, қишлоқ хўжалиги маҳсулотларини етиштириш, такрорий экинларни экиш ҳамда оила даромадини ошириш имкониятларига алоҳида эътибор қаратилди.
Шунингдек, хонадонлар ва кўчаларнинг санитария ҳолати, ҳудудларни ободонлаштириш, чиқиндиларни белгиланган жойларга ташлаш, ариқ ва йўлакларни тозалаш, кўкаламзорлаштириш ишларини янада кучайтириш масалалари ўрганилди.
Мулоқотлар давомида фуқароларнинг таклиф ва мурожаатлари тингланиб, аниқланган масалалар қайд этиб олинди. Уларни тегишли ташкилотлар билан ҳамкорликда ҳал этиш бўйича зарур чора-тадбирлар белгилаб олинди.
Бундай ўрганишлар аҳоли билан яқин мулоқотни таъминлаш, ҳудудлардаги мавжуд муаммоларни жойида аниқлаш ва маҳаллалар ободлигини янада оширишга хизмат қилади.