Mamlakatimiz mustaqilligining 35 yillik bayrami arafasida yurtimiz hayotida ushbu ulug‘ sana munosib nishonlanmoqda. Ayni shu qutlug‘ kunlar oldidan Yangi O‘zbekistonni barpo etish, inson qadrini ulug‘lash, jamiyatimizda tinchlik va totuvlikni mustahkamlash yo‘lida fidokorona mehnat qilib kelayotgan bir guruh yurtdoshlarimiz yuksak e’tirof etildi.

Davlatimiz rahbari tomonidan imzolangan tegishli Farmonga muvofiq, mamlakatimiz taraqqiyotiga munosib hissa qo‘shib, o‘z mehnati, tashabbusi va faolligi bilan el-yurt ravnaqiga xizmat qilib kelayotgan fuqarolar “O‘zbekiston Respublikasi mustaqilligining 35-yilligi” esdalik nishoni bilan taqdirlandilar.

Quvonarlisi, mazkur yuksak e’tirofga Xalq deputatlari Marg‘ilon shahar Kengashi deputatlari ham sazovor bo‘ldilar.

Ushbu mukofot — deputatlarning saylovchilar ishonchini oqlash, xalq manfaatlarini himoya qilish, hududni ijtimoiy-iqtisodiy rivojlantirish hamda jamiyat hayotida faol ishtirok etish borasidagi mehnatiga berilgan munosib bahodir.

Bunday yuksak e’tirof deputatlar zimmasiga yanada katta mas’uliyat yuklaydi. Zero, xalq vakili uchun eng oliy maqsad — el ishonchini oqlash, aholi murojaatlariga yechim topish va yurt taraqqiyotiga munosib hissa qo‘shishdir.

Mustaqilligimizning 35 yillik bayrami arafasidagi ushbu quvonchli voqea barcha marg‘ilonliklar uchun ham faxrli va unutilmas voqeadir.

Yuksak e’tirofga sazovor bo‘lgan deputatlarimizni ushbu sharafli mukofot bilan samimiy muborakbod etamiz!

Yangi O‘zbekistonning taraqqiyoti va xalqimiz farovonligi yo‘lidagi ezgu ishlarida ulkan muvaffaqiyatlar tilaymiz!