Jalaquduq tumanidagi «Jalaquduq» MFY hududida joylashgan «Sog‘lom avlod» oilaviy shifokorlik punkti
(OShP) binosini yangitdan qurish loyihasi bo‘yicha mahalla aholisi bilan ochiq muloqot o‘tkazildi. Uchrashuvda
mazkur zamonaviy tibbiyot maskanini barpo etish bo‘yicha Davlat Dasturiga kiritilgan loyiha taqdimoti Xalq deputatlari Jalaquduq tuman Kengashi deputati E. Qurbonov tomonidan amalga oshirildi. Muloqot davomida deputat tomonidan aholiga quyidagi imkoniyatlar va rejalar atroflicha tushuntirib berildi: · Zamonaviy sharoitlar: Yangi bino eng so‘nggi tibbiy uskunalar va qulay kutish zallari bilan ta’minlanadi. · Sifatli tibbiy xizmat: Mahalla fuqarolari uchun birlamchi tibbiy-sanitariya yordami ko‘rsatish sifati va tezkorligi yanada oshiriladi. · Qulay muhit: Binoda bemorlar va tibbiyot xodimlari uchun barcha zarur muhandislik-kommunikatsiya va issiqlik tizimlari to‘liq yaratiladi. Uchrashuv davomida fuqarolar tomonidan berilgan savollar va takliflar tinglanib, loyihani amalga oshirish jarayonida ularni inobatga
olish bo‘yicha mas’ullarga tegishli vazifalar belgilandi. «Aholimizga ko‘rsatilayotgan tibbiy xizmat sifatini
oshirish va ular uchun munosib sharoit yaratish doimiy e’tiborimizda bo‘ladi», — dedi deputat E. Qurbonov.