Monitoringda Xalq deputatlari Termiz shahar Kengashi kotibiyati mudiri A.Ashurov, Kengashning Mahalliy budjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiyasi raisi, ekspert guruhi rahbari A.Mustafakulov hamda Kengash kotibiyati bosh mutaxassisi R.Mamashukurov ishtirok etib, loyiha ijrosi bilan joyiga chiqqan holda tanishdilar.
Nazorat tadbiri davomida Xalq deputatlari Termiz shahar Kengashining 2026-yil 8-apreldagi VII-20-28-8-121-K/26-sonli qarori ijrosi yuzasidan amalga oshirilayotgan ishlar atroflicha o‘rganildi. Xususan, 2026-yil 1-mavsum yakunlariga ko‘ra g‘olib deb topilgan ID–053455290009-sonli loyiha doirasida 1-son ixtisoslashtirilgan maktab hududida faollar zali va zamonaviy kutubxona binosini qurish, shuningdek o‘quvchilar yotoqxonasini ta’mirlash ishlari ko‘zdan kechirildi.
O‘rganish jarayonida qurilish-ta’mirlash ishlarining belgilangan loyiha-smeta hujjatlariga muvofiqligi, bajarilgan ishlar sifati, qurilish materiallarining talab darajasida qo‘llanilishi, obyektni foydalanishga topshirish muddatlariga rioya etilishi hamda ajratilgan budjet mablag‘larining maqsadli va samarali sarflanishi yuzasidan tahlillar olib borildi.
Shuningdek, pudratchi tashkilot mas’ullari bilan muloqot qilinib, ishlarni jadallashtirish, qurilish sifatini ta’minlash, belgilangan muddatlarda yakunlash hamda yuzaga kelishi mumkin bo‘lgan kamchiliklarning oldini olish yuzasidan tegishli tavsiya va ko‘rsatmalar berildi.
"Tashabbusli budjet" loyihalari ustidan olib borilayotgan deputatlik nazoratining asosiy maqsadi – fuqarolar tomonidan ilgari surilgan tashabbuslarning o‘z vaqtida va sifatli amalga oshirilishini ta’minlash, budjet mablag‘larining ochiq va shaffof sarflanishini nazorat qilish hamda hududlarda ijtimoiy infratuzilmani yanada rivojlantirishdan iboratdir.
Xalq deputatlari Termiz shahar Kengashi tomonidan "Tashabbusli budjet" doirasida amalga oshirilayotgan barcha loyihalar ijrosi yuzasidan monitoring va deputatlik nazorati tadbirlari muntazam ravishda davom ettiriladi.