Xalq deputatlari Bo‘stonliq tumani Kengashining 2026-yilga mo‘ljallangan ish rejasiga muvofiq O‘zbekiston “Milliy tiklanish” demokratik partiyasidan saylangan deputat F.Axmedov va kotibiyat xodimi N.Kurganova tomonlaridan tumanning “S.Raximov” mahallasining ichki yo‘llarida amalga oshirilgan asfaltlashtirish ishlari sifati o‘rganildi.

Jarayonda asfalt yotqizishdan oldin amalga oshirilgan tayyorgarlik ishlari, xususan, yo‘l asosini tekislash va mustahkamlash, shag‘al qatlamini yotqizish, suv qochirish tizimlarining holati hamda yo‘lning uzoq muddat xizmat qilishini ta’minlaydigan muhandislik yechimlari tahlil qilindi. Shuningdek, asfalt qoplamasining qalinligi, tekisligi va sifat ko‘rsatkichlariga alohida e’tibor qaratildi.

Deputat mahalla faollari va aholi bilan suhbatlashib, ichki yo‘llarning ta’mirlanishi bo‘yicha fikr-mulohazalarini tingladi. Fuqarolar ko‘p yillar davomida ta’mirtalab holatga kelib qolgan ko‘chalarning asfaltlashtirilayotganidan mamnun ekanliklarini bildirish bilan birga, ayrim ichki ko‘chalarni ham navbatma-navbat ta’mirlash, yo‘l chetlarini tartibga keltirish, yomg‘ir suvlarini chiqarish tizimini yaxshilash bo‘yicha takliflarini ilgari surdilar.