Xalq deputatlari mahalliy Kengashi deputati xorijga xizmat safari davomida ham deputatlik maqomiga munosib tarzda harakat qilishi, mamlakatimizning xalqaro nufuzini mustahkamlashga xizmat qiladigan yuksak odob-axloq va muomala madaniyatiga rioya etishi lozim.

Rasmiy delegatsiyalar tarkibida yoki chet ellik fuqarolar bilan uchrashuvlarda deputat mahalliy davlat hokimiyati vakillik organining vakili ekanligini chuqur his etishi hamda o‘zining xatti-harakati, nutqi va muomalasi orqali Kengashning obro‘-e'tibori va nufuzini munosib namoyon etishi zarur.

Shuningdek, deputat xorijiy xizmat safari davomida safarning maqsad va vazifalarini to‘liq ro‘yobga chiqarishga, O‘zbekiston Respublikasi hamda mahalliy Kengash manfaatlarini himoya qilishga ko‘maklashishi, xizmat safari dasturida belgilangan tadbirlarda faol ishtirok etishi lozim.

Deputat tashrif buyurgan davlatning qonun hujjatlari, urf-odatlari va an'analarini hurmat qilishi, rasmiy hamda norasmiy uchrashuvlarda xalqaro muomala va diplomatik etiket qoidalariga qat'iy rioya etishi, o‘zining xulq-atvori bilan O‘zbekistonning ijobiy imijini mustahkamlashga hissa qo‘shishi zarur.

Mazkur odob-axloq qoidalariga rioya etish deputatning kasbiy mas'uliyati, Kengash nufuzini yuksaltirish hamda xalqaro hamkorlikni rivojlantirishning muhim omillaridan biri hisoblanadi.