Bugun Uchquduq tuman hokimligining katta majlislar zalida Xalq deputatlari Uchquduq tuman Kengashining navbatdagi 27-sessiyasi bo‘lib o‘tdi.

Sessiyada tuman Kengashi deputatlari, kun tartibidagi masalalarga aloqador korxona va tashkilotlar rahbarlari, davlat idoralari mas’ullari hamda ommaviy axborot vositalari vakillari ishtirok etdi.

Sessiya ishiga Xalq deputatlari Uchquduq tuman Kengashi raisi, tuman Kengashi deputati Umrbek Salimov raislik qildi.

Sessiya kun tartibida tumanning ijtimoiy-iqtisodiy rivojlanishi, aholi farovonligini oshirish, yoshlar siyosatini qo‘llab-quvvatlash, bandlikni ta’minlash hamda sog‘liqni saqlash tizimida korrupsiyaga qarshi kurashish masalalariga oid muhim masalalar ko‘rib chiqildi.

Xususan:
🔹 Uchquduq tuman mahalliy budjetining 2026-yil birinchi chorak daromadlari rejasidan oshirib bajarilgan qismi hisobidan mablag‘larni yo‘naltirish;
🔹 Tumanda yoshlarning yozgi ta’til davrini mazmunli tashkil etish, ularni sport, madaniyat, ma’naviyat va kasb-hunarga yo‘naltirishga qaratilgan “Dolzarb 90 kun” chora-tadbirlar rejasini tasdiqlash;
🔹 Uchquduq tuman hokimligi huzuridagi “Infratuzilma va ijtimoiy barqarorlik” jamg‘armasi mablag‘larini ustuvor yo‘nalishlarga yo‘naltirish;
🔹 Tuman kambag‘allikni qisqartirish va bandlikka ko‘maklashish bo‘limi tomonidan ishsizlikning oldini olish, yangi ish o‘rinlarini yaratish va aholi bandligini ta’minlash borasida amalga oshirilayotgan ishlar;
🔹 Tuman sog‘liqni saqlash bo‘limi tomonidan tibbiyot muassasalarida korrupsiyaga qarshi kurashish, ochiqlik va shaffoflikni ta’minlash yuzasidan olib borilayotgan ishlar to‘g‘risidagi hisobotlar tinglandi.

Sessiya davomida deputatlar tomonidan kun tartibidagi masalalar yuzasidan qator savollar, taklif va tavsiyalar bildirildi. Mutasaddi rahbarlarning axborotlari yuzasidan muhokamalar o‘tkazilib, mavjud muammolar va ularni bartaraf etish bo‘yicha aniq chora-tadbirlar belgilab olindi.

Muhokamalar yakunida kun tartibidagi barcha masalalar bo‘yicha tegishli qarorlar qabul qilinib, ularning ijrosini ta’minlash yuzasidan mas’ul tashkilotlar va mansabdor shaxslarga aniq vazifalar yuklatildi.

Xalq deputatlari Uchquduq tuman Kengashi tomonidan qabul qilingan mazkur qarorlar hududni yanada rivojlantirish, aholi turmush darajasini yaxshilash, yoshlarni qo‘llab-quvvatlash, bandlikni ta’minlash hamda ijtimoiy sohalarda samaradorlikni oshirishga xizmat qiladi.