Халқ депутатлари Пахтаобод тумани Кенгаши раиси, туман ҳокими А.Латифжонов битирувчи ёшлар, уларнинг ота-оналари ва ҳунармандлар билан мулоқот ўтказди. 

Ҳар йили умумий ўрта таълим мактабларини туман миқёсида минглаб ўқувчилар тамомлаб, катта ҳаёт сари йўл оладилар. Табиий-ки, улар бандлигини таъминлаш, ҳаётда ўз ўрниларини топишларига ёрдам бериш долзарб вазифа ҳисобланади.  

Кенгаш раиси Азизбек Латифжонов 37-ДИМИда айнан 10-, 11-синф ўқувчилари, уларнинг ота-оналари ва ҳудуддаги ҳунармандлар билан
учрашди. 

Ота-оналар асосан ёшларнинг ҳунар ўрганишлари, хусусан, тикувчилик, пазандачилик сингари касбларни ўргатувчи курслар ташкил этишни сўрашган бўлса, ўқувчи ёшлар IT йўналиши бўйича ҳам махсус курслар очиш зарурати ҳақида мурожаат қилишди.  

Тадбиркор-ҳунармандлар ёшларга ҳунар ўргатиш учун зарурий асбоб-анжомлар ва жой масаласида ёрдам сўраб туман раҳбарига
юзланишди.  

Мулоқот савол-жавобларга бой ва амалий руҳда бўлиб ўтди.  

Кўтарилган масалалар ижроси бўйича масъулларга топшириқ ва кўрсатмалар берилди.