Mahallalarda aholi, ayniqsa yoshlar va bolalar uchun sport bilan shug‘ullanish imkoniyatlarini kengaytirish, sog‘lom turmush tarzini targ‘ib etish maqsadida hududlardagi sport inshootlari holatini o‘rganish ishlari olib borilmoqda. Shu munosabat bilan Xalq deputatlari Parkent tuman Kengashiga 15-Beshkappa saylov okrugidan saylangan deputat, tuman Kengashi kotibiyati mudiri Berdiqulova Mavluda Tojiddinovna hamda 10-Boyqozon saylov okrugidan saylangan deputat Ermatov Alibek Xojimurotovich “Boyqozon” MFY raisi bilan hamkorlikda mahalla hududida joylashgan sport majmuasiga tashrif buyurishdi. Tashrif davomida sport majmuasining mavjud sharoitlari, sport zallari hamda ulardagi sport anjomlarining mavjudligi va texnik holati o‘rganildi. Xususan, sport zallarining yoritilishi, isitish tizimi, pol qoplamasi, xavfsizlik talablari, shuningdek, sport inventarlarining yetarliligi va ulardan foydalanish darajasi atroflicha ko‘rib chiqildi. O‘rganish jarayonida aniqlangan kamchiliklarni bartaraf etish, sport inshootlarining moddiy-texnik bazasini mustahkamlash hamda yoshlar uchun yanada qulay sharoitlar yaratish yuzasidan tegishli mutasaddilarga taklif va tavsiyalar berildi.