Ellikqal’a tumani Do‘stlik OFY hududida xalq deputatlari tuman Kengashiga 10-sonli “Adil” saylov okrugidan saylangan deputat Karimov O‘rinbay Tangribergenovich tomonidan saylovchilar bilan o‘tkazilgan uchrashuv davomida fuqarolarning bir qator murojaatlari tinglandi. 

 Jumladan, fuqaro Jumaniyazov Reyimbay tomonidan Adil aholi punktidagi elektr ta’minoti bilan bog‘liq muammo yuzasidan murojaat qilindi. 

Murojaatda aytilishicha, mazkur hududga yangidan 900 metr SIP kabel tortib kelingan bo‘lsada, u hozirgi kunga qadar transformatorga ulanmagani sababli aholi elektr ta’minotidan to‘liq foydalana olmayotgani bildirildi. 

Ushbu masala deputat tomonidan nazoratga olinib, “Xududiy elektr tarmoqlari” AJ Ellikqal’a tumani elektr ta’minotiga deputat so‘rovi yuborildi. So‘rov asosida muammo joyiga chiqib o‘rganildi va tegishli amaliy choralar ko‘rildi. 

Olib borilgan ishlar natijasida Adil aholi punktiga tortib kelingan 900 metr SIP kabel transformatorga ulandi. 

Shu tariqa mazkur hududda yashovchi aholi elektr energiyasi bilan barqaror ta’minlanishiga erishildi. 

Bugungi kunda fuqarolar murojaatlarini o‘z vaqtida ko‘rib chiqish, mavjud muammolarga amaliy yechim topish hamda aholi turmush
sharoitini yanada yaxshilash yo‘lida izchil ishlar olib borilmoqda. 

Deputat tomonidan saylovchilar bilan muloqotlar davom ettirilib, ko‘tarilgan har bir masala yuzasidan amaliy choralar ko‘rishga alohida e’tibor qaratilmoqda.