Xalq deputatlari Marg‘ilon shahar Kengashining 2026-yil 18-fevraldagi VII-20-13-11-168-K/26-son qaroriga muvofiq, jamg‘arma mablag‘lari hisobidan shaharning turli hududlaridagi dolzarb infratuzilmaviy masalalarni hal etish uchun jami 683,5 million so‘m mablag‘ ajratilgan. Mazkur mablag‘lar ko‘p qavatli uylarni ta’mirlash, yo‘llarni asfaltlashtirish, elektr ta’minotini yaxshilash, videokuzatuv tizimlarini o‘rnatish hamda ichimlik suvi tarmoqlarini tortish kabi muhim yo‘nalishlarga yo‘naltirilgan.

Shu munosabat bilan qaror ijrosi doirasida olib borilayotgan ishlarning holati Kotibiyat mudiri A.Ermatov, shahar Kengashi deputati A.Mahkamov, kotibiyat bosh mutaxassisi N.Akbarova hamda mahalla faollari ishtirokida joyiga chiqqan holda o‘rganildi.

O‘rganish jarayonida qarorning 4.5-bandida belgilangan Yangi bog‘ mahalla fuqarolar yig‘ini Turkiston ko‘chasiga 300 metr masofaga ichimlik suvi tarmog‘ini tortish loyihasi ko‘zdan kechirildi. Ushbu maqsad uchun jamg‘arma hisobidan 150 million so‘m mablag‘ ajratilgan.

Mas’ullar tomonidan ma’lum qilinishicha, loyiha bo‘yicha qurilish-montaj ishlari boshlangan bo‘lib, jarayon belgilangan reja asosida davom ettirilmoqda. Mahalla aholisi tomonidan uzoq yillardan buyon ko‘tarib kelinayotgan ichimlik suvi bilan bog‘liq muammoni hal etish ushbu hududda yashovchi fuqarolar uchun qulaylik yaratishi kutilmoqda.

O‘rganish davomida ishlarning sifati, belgilangan muddatlarga rioya etilishi hamda ajratilgan mablag‘larning maqsadli sarflanishi masalalariga alohida e’tibor qaratildi.