Matonat mahallasida ichki yo‘llar holati o‘rganildi

Xalq deputatlari Navoiy shahar Kengashi deputati Abdug‘aniyev Abror tomonidan Navoiy shahrining Matonat mahallasi hududida joylardagi infratuzilma holatini o‘rganish maqsadida navbatdagi monitoring tadbiri o‘tkazildi.
O‘rganish jarayonida mahalla hududidagi ichki ko‘chalar va yo‘llarning texnik holati ko‘zdan kechirildi. Xususan, ayrim ichki yo‘llarda asfalt qoplamasining yemirilgani, chuqurchalar hosil bo‘lgani hamda bu holat transport vositalari va piyodalar harakati xavfsizligiga salbiy ta’sir ko‘rsatishi mumkinligi aniqlandi.

Shuningdek, ko‘p qavatli uy-joylarga xizmat ko‘rsatuvchi boshqaruv servis kompaniyalari faoliyati, yerto‘lalarning holati, tashqi yoritish tizimining ishlashi hamda hududlarning sanitariya holati va obodonlashtirish ishlari ham o‘rganildi.

Monitoring davomida aniqlangan kamchiliklarni bartaraf etish, ichki yo‘llarni ta’mirlash, hududlarda tozalik va tartibni ta’minlash hamda aholi uchun qulay va xavfsiz muhit yaratish bo‘yicha mutasaddi tashkilotlarga tegishli taklif va tavsiyalar berildi.

Deputat Abdug‘aniyev Abror tomonidan mahalla aholisini qiynab kelayotgan muammolarni bosqichma-bosqich hal etish, infratuzilmani yanada yaxshilash va kommunal xizmatlar sifatini oshirish yuzasidan amaliy choralarni kuchaytirish zarurligi ta’kidlandi.
Mazkur o‘rganish ishlari mavjud muammolarni o‘z vaqtida aniqlash va bartaraf etish, shuningdek, aholi uchun munosib turmush sharoitlarini yaratishga xizmat qiladi.