Xalq deputatlari Bag‘dod tumani Kengashi deputati G‘.Abdullayev tomonidan Qorovultepa mahalla fuqarolar yig‘inining murojaati asosida hududdagi muammoli holat o‘rganilib, tegishli mas’ulga deputat so‘rovi yuborildi.

🔹 O‘rganish davomida Qorovultepa MFYning Qizg‘aldoq ko‘chasida joylashgan suv minorasi avariya holatida ekani, uning konstruksiyalari yemirilgani va inshootning qulab tushish xavfi mavjudligi aniqlandi.
Shuningdek, suv minorasining pastki qismi shikastlanganligi sababli ichimlik suvi uzluksiz ravishda oqib chiqib ketayotgani, buning natijasida suv resurslari isrof bo‘lishi hamda davlat mulkiga zarar yetkazilayotgani qayd etildi.

⚠️ Mazkur holat suv minorasi atrofida yashovchi aholi, ayniqsa yosh bolalar hayoti va sog‘lig‘i uchun xavf tug‘dirayotganligi sababli, masalani zudlik bilan hal etish zarurati mavjud.

Shu munosabat bilan, 2026-yil 2-oktabr kuni 76-ds-287-26-sonli deputat so‘rovi Bag‘dod tumani hokimining qurilish, to‘siqlarsiz muhit yaratish, kommunikatsiyalar, kommunal xo‘jalik, ekologiya va ko‘kalamzorlashtirish masalalari bo‘yicha o‘rinbosari U.Yigitaliyevga yuborildi.

📋 Deputat so‘rovida suv minorasining texnik holatini tegishli mutaxassislar ishtirokida o‘rganish, unga huquqiy va texnik baho berish, zarur hollarda ta’mirlash va mustahkamlash yoki xavfsiz tarzda demontaj qilish, shuningdek, ichimlik suvining oqib chiqishiga barham berish bo‘yicha tegishli choralar ko‘rish so‘ralgan.