Xalq deputatlari tuman Kengashining 2026-yilga mo‘ljallangan ish rejasiga muvofiq O‘zbekiston Xalq demokratik partiyasidan saylangan deputat J.Sadirov tomonidan tuman Kambag‘allikni qisqartirish va bandlikka ko‘maklashish bo‘limida O‘zbekiston Respublikasining “Aholi bandligi to‘g‘risida”gi Qonuni ijrosi ishlab chiqilgan savolnoma asosida o‘rganildi.

🔵Mazkur Qonunga muvofiq, ish qidirayotgan fuqarolarga ishga joylashishda ko‘maklashish, ularni mehnat bozoridagi mavjud bo‘sh ish o‘rinlari to‘g‘risida xabardor qilish hamda kasbiy imkoniyatlaridan kelib chiqqan holda munosib ish bilan ta’minlash bandlik organlarining muhim vazifalaridan hisoblanadi. Shu nuqtai nazardan, o‘rganish jarayonida markazga murojaat qilayotgan fuqarolar bilan ishlash tizimi, ularning murojaatlarini ko‘rib chiqish, ish qidirayotgan shaxslarni tegishli tartibda ro‘yxatga olish va ishga joylashtirishga ko‘maklashish jarayonlari ko‘zdan kechirildi.

🔵Aholining bandligini ta’minlashda faqat mavjud bo‘sh ish o‘rinlariga yo‘naltirish bilan cheklanib qolmasdan, mehnat bozori talabidan kelib chiqib fuqarolarni kasb-hunarga o‘qitish, qayta tayyorlash va malakasini oshirishga yo‘naltirish muhimligi ta’kidlandi. Qonunchilikda ish qidirayotgan va ishsiz shaxslarni kasbga tayyorlash, qayta tayyorlash hamda malakasini oshirish uchun tegishli mexanizmlar belgilangan.

🔵Shuningdek, aholining ijtimoiy ehtiyojmand qatlamlarini ishga joylashtirish masalasiga alohida e’tibor qaratildi. Jumladan, ishga joylashishda qo‘shimcha ko‘mak va kafolatlarga muhtoj bo‘lgan fuqarolar bilan manzilli ishlash, ularning imkoniyatlari va kasbiy ko‘nikmalarini inobatga olgan holda bandligini ta’minlash muhimligi qayd etildi.

🔵Deputat tomonidan mazkur Qonun talablariga asosan 2027-yil uchun ish o‘rinlarining eng kam sonini belgilash masala bo‘yicha takliflar ishlab chiqish ishlarini jadallashtirish hamda tasdiqlash uchun Kengashga kiritish bo‘yicha tegishli tavsiyalar berildi.