Nazorat-tahlil tadbirlari davomida “Surxon sohili” mahallasining Xondamir va Surxon ko‘chalarida istiqomat qiluvchi fuqarolar bilan uchrashuvlar o‘tkazildi. O‘rganishlar natijasida hududda gaz quvurlari mavjud bo‘lishiga qaramay, ayrim xonadonlar hanuzgacha tabiiy gaz tarmog‘iga ulanmaganligi aniqlandi.

Fuqarolar tomonidan ushbu muammoni hal etish, mavjud gaz tarmog‘iga ulanishda amaliy yordam ko‘rsatish yuzasidan murojaatlar bildirildi.

Mazkur holat yuzasidan deputat tomonidan “Termizshahargaz” gaz ta’minoti bo‘limi boshlig‘i X. Berdimuratov nomiga deputat so‘rovi kiritilib, unda:

- gaz quvuri mavjud bo‘la turib, ayrim xonadonlarning tabiiy gaz tarmog‘iga ulanmaganlik sabablari o‘rganilishi;

- mavjud gaz infratuzilmasidan foydalanish imkoniyatlari texnik jihatdan ko‘rib chiqilishi;

- gaz tarmog‘iga ulanishi mumkin bo‘lgan xonadonlar bo‘yicha zarur choralar belgilanishi;

- fuqarolarning murojaatlarini ijobiy hal etish yuzasidan amaliy yordam ko‘rsatilishi;

- amalga oshirilgan ishlar va ko‘rilgan choralar haqida qonunchilikda belgilangan tartibda yozma ma’lumot taqdim etilishi so‘ralgan.

Aholining kommunal xizmatlardan to‘liq va sifatli foydalanishini ta’minlash, mavjud muammolarni joyida o‘rganib, mutasaddi tashkilotlar oldiga aniq vazifalar qo‘yish deputatlik faoliyatining muhim yo‘nalishlaridan biri hisoblanadi.