Deputatlar tomonidan nazorat-tahlil tadbirlari o'tkazildi

🔹Aholining turmush sharoitini yaxshilash, mahallalar infratuzilmasini rivojlantirish hamda "Kambag'allikdan farovonlik sari" dasturida belgilangan vazifalarni izchil amalga oshirish maqsadida O'zbekiston Respublikasi Prezidentining 2025-yil 30-yanvardagi PF–17-son "Aholini ijtimoiy himoya qilish tizimini moliyalashtirish tartib-taomillarini takomillashtirish to'g'risida"gi Farmoni asosida qator amaliy ishlar olib borilmoqda.

🔹Mazkur Farmon ijrosini ta'minlash maqsadida Xalq deputatlari Rishton tumani Kengashining 2026-yil 26-maydagi VII-20-19-11-158-K/26-sonli qarori bilan Guliston, M. Topiboldiyev, Amirobod, Polvonobod, Ar. Roshidoniy, Miskin, Pastki Beshkapa hamda Xo'ja Ilg'or mahallalaridagi ichki ko'chalarning asfaltlashtirilmagan qismlarini asfaltlashtirish uchun zarur mablag'lar ajratilishi tasdiqlangan.

🔹 Mazkur qaror ijrosi ustidan deputatlik nazoratini ta'minlash maqsadida Xalq deputatlari Rishton tumani Kengashining" Korrupsiyaga qarshi kurashish va xavfsizlik masalalari bo'yicha" doimiy komissiyasi a'zosi J. Mamajonov, Kengash kotibiyati mudiri A. Sobirov, O'zLiDeP Rishton tuman Kengashi ijro apparati rahbari R.Kamolov tomonidan Polvonobod va Amirobod mahallalari raislari ishtirokida joylarda nazorat-tahlil va o'rganish ishlari olib borildi.

🔹 O'rganish jarayonida yo'l qurilish ishlarining belgilangan loyiha va me'yoriy talablar asosida olib borilayotgani, qurilish materiallarining sifati, ajratilgan mablag'larning maqsadli va samarali sarflanishi hamda ishlarning shaffof tashkil etilishiga alohida e'tibor qaratildi.

🔹Deputatlik nazorati doirasidagi bunday o'rganishlar amalga oshirilayotgan loyihalarning sifatli bajarilishini ta'minlash, ajratilgan mablag'lardan oqilona foydalanish hamda aholi uchun qulay va xavfsiz infratuzilmani yaratishda muhim ahamiyat kasb etadi.