O‘zbekiston Respublikasi Prezidentining PQ-406-son qarori, Senat Kengashining KQ-35-V-son qarori hamda mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiyalar ijrosini ta’minlash maqsadida Xalq deputatlari Marg‘ilon shahar Kengashining Ijtimoiy soha, yoshlar siyosati, madaniyat va sport masalalari bo‘yicha doimiy komissiyasi raisi A. Mahkamov hamda Mahalliy budjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiya a’zosi M. Raimdjanov tomonidan Marg‘ilon shahrida ijtimoiy-iqtisodiy rivojlanish yuzasidan belgilangan chora-tadbirlarning ijrosi joyiga chiqib o‘rganildi.

O‘rganish davomida hududlarda tadbirkorlikni rivojlantirish, yangi ish o‘rinlarini yaratish va ajratilgan moliyaviy mablag‘lardan samarali foydalanish holatiga alohida e’tibor qaratildi.

Shu munosabat bilan yakka tartibdagi tadbirkor Karimov Abdulxamid Raimdjanovich faoliyati ham ko‘zdan kechirildi. Tadbirkor salqin ichimliklar ishlab chiqarish yo‘nalishida faoliyatini yo‘lga qo‘ygan bo‘lib, loyihani amalga oshirish uchun 25 million so‘m kredit mablag‘i olgan. Bundan tashqari, o‘zining 25 million so‘mlik mablag‘ini ham loyiha rivojiga yo‘naltirgan.

Amalga oshirilgan sa’y-harakatlar natijasida korxonada 5 ta yangi ish o‘rni yaratilib, aholi bandligini ta’minlashga munosib hissa qo‘shilmoqda.

Deputatlar tomonidan olib borilgan o‘rganishlar davomida tadbirkorlik subyektlarini qo‘llab-quvvatlash, ishlab chiqarish hajmini kengaytirish hamda yangi ish o‘rinlarini ko‘paytirishga qaratilgan ishlarning amaliy natijalari baholandi. Bu kabi manzilli nazorat tadbirlari hududlarni ijtimoiy-iqtisodiy rivojlantirish, aholi farovonligini oshirish va davlat dasturlarining samarali ijrosini ta’minlashda muhim ahamiyat kasb etadi.