MANZILLI DASTUR IJROSI DOIRASIDA O‘RGANISH OLIB BORILDI 

Xalq deputatlari Quva tuman Kengashi deputati F. Xashimova hamda
tuman Kengashi kotibiyati bosh mutaxassisi A. Fozilov tomonidan Tojik
mahalla fuqarolar yig‘inida amalga oshirilayotgan bunyodkorlik va
obodonlashtirish ishlari joyiga chiqib o‘rganildi. 

O‘rganish davomida asosiy e’tibor “og‘ir” toifaga kiritilgan mazkur
mahallani kompleks rivojlantirish hamda uning ixtisoslashuvini
chuqurlashtirishga qaratilgan “Manzilli dastur” doirasida infratuzilmani
yaxshilash bo‘yicha amalga oshirilayotgan ishlarga qaratildi. 

Xususan, “PLANDEM” MChJ tomonidan Tojik ko‘chasida 1 kilometr
uzunlikdagi piyodalar yo‘lagi hamda beton ariq qurilishi ishlari
o‘rganilib, qurilish jarayonining borishi, bajarilayotgan ishlarning sifati,
loyiha hujjatlariga muvofiqligi va belgilangan muddatlarga rioya etilishi
monitoring qilindi. 

Shuningdek, mazkur loyihaning amalga oshirilishi mahalla aholisi uchun
qulay va xavfsiz piyodalar harakatini ta’minlash, ichki yo‘llarning
infratuzilmasini yaxshilash, yomg‘ir va oqova suvlarni tartibli chiqarish
orqali hududning sanitariya holatini yanada yaxshilashga xizmat qilishi alohida
ta’kidlandi. 

Monitoring yakunida mas’ullarga qurilish-ta’mirlash ishlarini belgilangan
muddatlarda, amaldagi qurilish me’yorlari va sifat talablariga to‘liq rioya
etgan holda yakunlash yuzasidan tegishli tavsiya va ko‘rsatmalar berildi. 

Aniqlangan kamchiliklar “Deputatning ko‘cha aylanish daftari”ga qayd
etilib, bartaraf etilishi deputat nazoratiga olindi.