Aholi murojaatlarini tinglash, ularni joyiga chiqib oʻrganish va amaliy yechim topish xalq deputatlari zimmasidagi muhim vazifalardan biridir. Xalq deputatlari Margʻilon shahar Kengashi 25-Orolboʻyi saylov okrugi deputati M.Abduraxmonova tomonidan saylovchilar bilan olib borilayotgan ochiq muloqotlar ham ana shunday ezgu maqsadga xizmat qilmoqda.

Navbatdagi uchrashuvlardan birida 25-Orolboʻyi saylov okrugi hududidagi Orolboʻyi mahalla fuqarolar yigʻinida istiqomat qiluvchi fuqarolar elektr uzatish tarmoqlariga yaqin oʻsgan daraxt shoxlari xavf tugʻdirayotgani, kuchli shamol va noqulay ob-havo sharoitida elektr taʼminotida uzilishlar yuzaga kelishi mumkinligi haqida deputatga murojaat qildilar.

Deputat M. Abduraxmonova mazkur murojaatni nazoratga olib, muammoni joyiga chiqib oʻrgandi. Shuningdek, shahar elektr tarmoqlari korxonasi mutaxassislari ishtirokida holat atroflicha tahlil qilinib, xavfsizlikni taʼminlash hamda mavjud muammoni bartaraf etish boʻyicha tegishli tashkilotlar bilan hamkorlikda ish olib borishga kelishib olindi. Zarur ruxsatnomalar rasmiylashtirilgach, amaliy ishlarni qisqa muddatlarda bajarish yuzasidan aniq choralar belgilandi.

Deputat tashabbusi va mutasaddi tashkilotlarning hamkorligi natijasida elektr uzatish tarmoqlariga tegib turgan daraxt shoxlari maxsus texnika yordamida kesilib, xavfli holat bartaraf etildi. Natijada elektr tarmoqlarining barqaror ishlashi taʼminlandi, avariya holatlari va elektr energiyasi uzilishlarining oldini olish uchun zarur sharoit yaratildi.

Eng muhimi, fuqarolar tomonidan koʻtarilgan masala eʼtibordan chetda qolmadi va deputat tashabbusi bilan qisqa muddatda oʻz yechimini topdi. Orolboʻyi mahallasi aholisi murojaatlariga befarq boʻlmagan deputat M.Abduraxmonovaga hamda muammoni bartaraf etishda ishtirok etgan shahar elektr tarmoqlari korxonasi xodimlariga samimiy minnatdorlik bildirdilar.

Bu kabi amaliy natijalar deputatlik faoliyatining asosiy mezoni – xalq bilan doimiy muloqot qilish, ularning muammolarini oʻz vaqtida oʻrganish va ijobiy hal etish tamoyili izchil amalga oshirilayotganining yana bir yorqin ifodasidir.