Ózbekstan Respublikası Oliy Majlisi Nızamshılıq palatasındaǵı Ózbekstan Xalıq demokratiyalıq partiyası frakciyasınıń basshısı U.Inoyatov basshılıǵındaǵı respublika wákilleri Bozataw rayonındaǵı "Qusxanataw" APJda bolıp, máhállede ámelge asırılıp atırǵan jumıslar menen tanıstı hám rayonlıq Keńes deputatları, máhálle jetiligi aǵzaları menen keńeytilgen sóylesiw ótkerdi.
Ushırasıwda máhállelerde puqaralarǵa jaqınnan járdem kórsetiw, sociallıq qollap-quwatlaw jumısların jetilistiriw, xalıqtıń turmıs dárejesin jaqsılaw, abadanlastırıw hám infrastrukturanı rawajlandırıw boyınsha ámelge asırılıp atırǵan jumıslar keńnen dodalandı.
Rayon deputatları óz saylaw okruglerinde alıp barıp atırǵan jumısları, puqaralardıń múrájatların úyreniw hám olardı sheshiw boyınsha ámeliy tájiriybeleri menen ortaqlasıp, deputatlıq qadaǵalawdıń nátiyjeliligin arttırıw, máhálle institutı menen birge islesiwdi kúsheytiw boyınsha usınısların bildirdi.
Sóylesiw dawamında puqaralardıń múrájatların sistemalı túrde kórip shıǵıw, sociallıq mashqalalardı waqtında anıqlaw hám olardı tiyisli mákemeler menen birgelikte sheshiw, sonday-aq, xalıq penen ashıq hám turaqlı pikirlesiwdi jolǵa qoyıwdıń áhmieti atap ótildi.
Sapar juwmaǵında respublika wákilleri máhállede alıp barılıp atırǵan ámeliy jumıslardı joqarı bahalap, rayonlıq Keńes deputatları, máhálle jetiligi hám tiyisli shólkemlerdiń óz-ara birge islesiwin bunnan bılay da bekkemlew boyınsha tiyisli usınıslar berdi.