Ózbekstan Respublikası Oliy Majlisi Nızamshılıq palatasındaǵı Ózbekstan Xalıq demokratiyalıq partiyası frakciyasınıń baslıǵı U.Inoyatov basshılıǵındaǵı respublika wákilleri Bozataw rayonında bolıp, sociallıq taraw obektleriniń jumısı menen tanıstı hám xalıq wákilleri menen bir qatar ushırasıwlar ótkerdi.
Delegaciya quramında Ózbekstan Respublikası Oliy Majlisi Nızamshılıq palatasınıń deputatı S.Imamova hám Ózbekstan XDP Qaraqalpaqstan Respublikası Keńesiniń baslıǵı, Qaraqalpaqstan Respublikası Joqarǵı Keńesindegi partiya frakciyasınıń baslıǵı X.Eshimbetov ta qatnastı.
Sapar dawamında miymanlar Bozataw sanatoriyasında bolıp, bul jerde Xalıq deputatları Bozataw rayonlıq Keńesi 2-sanlı "Erik baǵ" saylaw okrugi deputatı, rayon hákimi B.Ubbiniyazov, 1-sanlı "Palwash ataw" saylaw okrugi deputatı, rayonlıq Keńes sekretariatınıń baslıǵı A.Ibragimov hám 3-sanlı "Mádeniyat" saylaw okrugi deputatı, G.Yusupovlar menen birgelikte mákemeniń xızmeti, puqaralar ushın jaratılǵan sharayatlar hám kórsetilip atırǵan sociallıq-medicinalıq xızmetler menen jaqınnan tanıstı.
Úyreniwler dawamında sociallıq obektlerde alıp barılıp atırǵan jumıslardıń nátiyjeliligi, xalıqqa kórsetilip atırǵan xızmet sapasın jáne de jaqsılaw, infrastrukturanı rawajlandırıw hám puqaralar ushın qolaylı sharayatlar jaratıw máselelerine ayrıqsha itibar qaratıldı.
Sonday-aq, rayon deputatları menen bolǵan sóylesiwde saylawshılar múrájatların óz waqtında kórip shıǵıw, deputatlıq qadaǵalawdı kúsheytiw hám jergilikli Keńeslerdiń ámeliy tájiriybesin arttırıw boyınsha pikir alısıldı. Ushırasıwlar dawamında xalıq penen ashıqtan-ashıq sóylesiwdi keńeytiw hám ámeliy nátiyjege qaratılǵan jumıslardı izbe-iz alıp barıwdıń áhmieti atap ótildi.