КОТИБИЯТ ФАОЛИЯТИ ЎРГАНИЛДИ
Олий Мажлис Сенати Кенгашининг 2025 йил 28 январдаги «Халқ депутатлари маҳаллий Кенгашлари фаолиятини намунали ташкил этиш тўғрисида»ги КҚ–51–V-сонли қарори ижросини таъминлаш мақсадида Халқ депутатлари Янгиқўрғон тумани Кенгаши котибиятида ўрганиш ишлари амалга оширилди.
Ўрганиш ишлари Халқ депутатлари Наманган вилояти Кенгаши котибияти мутахассиси М. Имамов томонидан олиб борилди.
Ўрганиш жараёнида туман Кенгаши котибиятида ҳужжатлар билан ишлаш тизими, иш юритиш ҳолати, ҳужжатларни белгиланган талаблар асосида тўғри ва ўз вақтида расмийлаштириш, уларнинг ижросини таъминлаш ҳамда назоратга олиш ишлари атрофлича таҳлил қилинди.
Шунингдек, котибиятнинг белгиланган минимал талаблар асосида жиҳозланганлик ҳолати, ходимлар учун яратилган шарт-шароитлар, ахборот-коммуникация технологияларидан фойдаланиш ва электрон тизимларда ишларни ташкил этиш масалалари ҳам кўриб чиқилди.
Ўрганиш давомида Кенгаш сессиялари ва доимий комиссиялар йиғилишларини ташкил этиш, қабул қилинган қарорларни расмийлаштириш ва ижрочиларга етказиш, депутатлик сўровлари ҳамда фуқаролар мурожаатлари ижросини мониторинг қилиш ҳолатига алоҳида эътибор қаратилди.
Якунлар бўйича котибият фаолиятини янада самарали ташкил этиш, иш жараёнларини тизимлаштириш, ҳужжатлар ижроси устидан назоратни кучайтириш ва иш юритишни замонавий талаблар асосида такомиллаштириш юзасидан тегишли кўрсатма ҳамда тавсиялар берилди.
Котибият мутахассисларига аниқланган камчиликларни бартараф этиш, ижро интизомини мустаҳкамлаш ва маҳаллий Кенгаш фаолияти самарадорлигини янада ошириш бўйича вазифалар белгилаб берилди.