Xalq deputatlari Chilonzor tumani Kengashi deputati Nazirov Madaminjon Ma’rufjon o‘g‘li tomonidan saylovchilardan kelib tushgan murojaatlar hamda hududdagi yo‘l harakati xavfsizligi bilan bog‘liq mavjud holat asosida Toshkent shahar IIBB Yo‘l harakati xavfsizligi boshqarmasi boshlig‘iga deputat so‘rovi yuborildi.

Deputat so‘rovida Naqqoshlik ko‘chasi, Nosirxon masjididan chiqaverish yo‘lida transport vositalari va piyodalar harakati xavfsizligini ta’minlash, mazkur hududdagi mavjud vaziyatni vakolatli tartibda o‘rganish hamda yo‘l-transport hodisalarining oldini olishga qaratilgan qo‘shimcha choralarni ko‘rish masalasi ko‘tarilgan.

-Xususan, ushbu yo‘l uchastkasida transport oqimi, piyodalar harakati, ko‘rinish masofasi, tezlik rejimi, tirbandlik darajasi va avariya xavfi yuzasidan tahlil o‘tkazilganligi, shuningdek, sun’iy notekislik (tezlikni pasaytiruvchi qurilma), tegishli yo‘l belgilari yoki boshqa texnik vositalarni o‘rnatish imkoniyati ko‘rib chiqilgan yoki chiqilmaganligi yuzasidan asoslantirilgan ma’lumot taqdim etilishi;

-shuningdek, deputat so‘rovida mazkur hududda yo‘l harakati xavfsizligini ta’minlash maqsadida amalga oshirilgan va rejalashtirilayotgan chora-tadbirlar, zarurat aniqlangan taqdirda esa yo‘l harakatini tashkil etish sxemasiga o‘zgartirish kiritish, tegishli texnik vositalarni o‘rnatish bo‘yicha mas’ul tashkilotlar hamda amalga oshirish muddatlari to‘g‘risida qonunchilikda belgilangan tartibda yozma axborot taqdim etilishi so‘ralgan.