Ўрганиш жараёнида кўп қаватли уйларнинг техник ҳолати, умумий фойдаланишдаги ҳудудлар, подъезд ва ертўлаларнинг санитария ҳолати, муҳандислик-коммуникация тармоқларининг созлиги, ташқи ва ички ёритиш тизимлари, шунингдек, аҳоли учун яратилган шарт-шароитлар кўздан кечирилди.

Шу билан бирга, уй-жойларни сақлаш ва улардан самарали фойдаланиш, ҳудудларни ободонлаштириш ҳамда аҳолининг яшаш шароитларини яхшилаш борасида амалга оширилаётган ишлар таҳлил қилинди.

Депутатлар томонидан маҳалла фаоллари ва аҳоли вакиллари билан мулоқот ўтказилиб, кўп қаватли уйларда истиқомат қилувчи фуқароларнинг муаммо ва таклифлари ўрганилди.

Айниқса, уй-жойга муҳтож хотин-қизлар ҳамда ижтимоий ҳимояга муҳтож оилаларнинг яшаш шароитларига алоҳида эътибор қаратилди.

Ўрганиш натижаларига кўра, аниқланган камчиликларни бартараф этиш, кўп қаватли уйларнинг техник ва санитария ҳолатини янада яхшилаш, аҳоли учун муносиб ва хавфсиз яшаш муҳитини яратиш юзасидан тегишли ташкилотларга таклиф ва тавсиялар берилди. Мазкур йўналишдаги ишлар устидан депутатлик назоратини изчил давом эттириш белгиланди.