Xalq deputatlari Bo‘stonliq tumani Kengashining 2026-yilga mo‘ljallangan Ish rejasiga muvofiq O‘zbekiston Liberal demokratik partiyasidan saylangan deputat A.Kulbayev tomonidan tumanning “Dumaloq” mahallada joylashgan “Istiqlol” madaniyat saroyi hamda uning qoshida faoliyat yuritayotgan kutubxona ishi o‘rganildi.

O‘rganish jarayonida 150 o‘rinli madaniyat saroyida aholi, ayniqsa yoshlarning bo‘sh vaqtlarini mazmunli tashkil etish, milliy qadriyatlar va ma’naviy merosimizni targ‘ib qilish, turli madaniy-ma’rifiy tadbirlarni tashkil etish borasida amalga oshirilayotgan ishlar bilan tanishildi.

Shuningdek, muassasa qoshida tashkil etilgan kutubxonada kitob fondi, kitobxonlarga xizmat ko‘rsatish sifati, yangi adabiyotlar bilan ta’minlanganlik darajasi hamda aholining kitobxonlik madaniyatini yuksaltirishga qaratilgan ishlar holatini o‘rgandi. Kutubxona xodimlari bilan bo‘lgan muloqotda o‘tgan bir yil davomida o‘zbek va qozoq tillardagi badiiy, ilmiy-ommabop kitoblar soni 456 mingtaga yetkazilganligi ta’kidlandi.

O‘rganish yakunida madaniyat saroyi va kutubxona faoliyatini yanada takomillashtirish, aholining madaniy-ma’rifiy ehtiyojlarini to‘liq qondirish hamda yoshlarni kitobxonlikka keng jalb etish bo‘yicha tegishli tavsiyalar berildi.