“Qahramon” MFYda 330 o‘rinli yangi maktab va sport zali qurilishi davom etmoqda

Xalq deputatlari Termiz tuman Kengashi kotibiyati mudiri A. Avliyakulov 7-Qahramon saylov okrugi deputati S.Xakimov bilan birgalikda Termiz tumanining “Qahramon” MFY hududida barpo etilayotgan yangi umumta’lim maktabi qurilish jarayonlari bilan tanishdi.

Tashrif davomida mas’ullar tomonidan qurilish ishlari sifati, belgilangan reja va muddatlarga rioya etilishi hamda obyektda yaratilayotgan shart-sharoitlar o‘rganildi. Ta’kidlanishicha, loyiha doirasida 330 o‘rinli zamonaviy o‘quv binosi hamda 12x24 o‘lchamdagi sport zali qurilishi amalga oshirilmoqda.

Ayni paytda qurilish-montaj ishlari jadval asosida barqaror davom etmoqda. Mutasaddilar tomonidan ishlarning sifatli va o‘z vaqtida yakunlanishi bo‘yicha tegishli tavsiyalar berildi.

Yangi ta’lim maskani foydalanishga topshirilgach, “Qahramon” MFY hududida yashovchi o‘quvchilar uchun zamonaviy ta’lim sharoitlari yaratiladi, yoshlarning bilim olish imkoniyatlari kengayadi hamda ta’lim sifati yanada oshadi.