Jalaquduq tuman Kengashi deputati M.Turg`unova fuqarolarni qabul qilish kuni munosabati bilan Ittifoq MFYda navbatdagi
qabulni o`tkazdi. Qabul MFY raisi M.Sherg`ozieva xabardorligida va tasdiqlangan qabul jadvali asosida tashkil etildi. Unda mahalla aholisi o`zlarini qiziqtirgan masalalar, muammo va takliflar bilan ishtirok etdilar. Suhbat davomida fuqarolarning murojaatlari atroflicha o`rganilib,
har bir masalaga alohida yondashildi. Ayrim murojaatlar joyida hal etildi, fuqarolarga huquqiy va amaliy maslahatlar berildi. Bu esa aholining davlat organlariga bo`lgan ishonchini yanada mustahkamlashga xizmat qildi. Jumladan, imtiyozli kredit olish masalasida murojaat qilgan fuqaro G`ulomova Oydinoy tuman hokimi yordamchisi F.Yo`ldashevaga yo`naltirildi. Uning arizasi qabul qilinib, belgilangan tartibda ro`yxatga olindi hamda tegishli choralar ko`rish bo`yicha ishlar boshlandi. Shu kuni yana bir xayrli ish amalga oshirildi. I.Sharipov ko`chasida yashovchi 1-guruh nogironligi bo`lgan fuqaro Abdujalilova Zarifaxon Turgun qiziga tuman Inson
xizmatlari markazi tomonidan uy sharoitida harakatlanish va toza havoda sayr qilishi uchun bepul nogironlik aravachasi topshirildi. Mazkur yordam xonadon a`zolariga katta quvonch bag`ishladi. Ular ko`rsatilgan e`tibor va g`amxo`rlik uchun tuman hokimligiga samimiy minnatdorchilik bildirdilar. Qabul jarayoni yakunlanganidan so`ng deputat M.Turgunova va MFY raisi M.Sherg`ozieva bilan birgalikda mahallada amalga oshirilishi lozim bo`lgan ustuvor vazifalar muhokama qilindi. Jumladan, ijtimoiy himoyaga muhtoj oilalarni qo`llab-quvvatlash, bandlikni ta`minlash, hududni obodonlashtirish hamda aholi bilan muloqotni yanada kuchaytirish bo`yicha rejalar belgilab olindi. Bunday qabullar aholining dardini eshitish, ularning muammolarini o`z vaqtida hal etish hamda mahallada ijtimoiy barqarorlikni ta`minlashda muhim ahamiyat kasb etmoqda.