Xalq deputatlari Ishtixon tuman Kengashi deputati A.Rabbimov tomonidan, hududda tibbiy xizmat sifatini yaxshilash maqsadida bildirgan takliflar asosida, O‘zbekiston Respublikasi Prezidentining 2025-yil 27-dekabrdagi “2026–2028-yillarda O‘zbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari to‘g‘risida” PQ-393-sonli Qarori bilan tasdiqlangan o‘z saylov okrugidagi Minglar mahallasida joylashgan 14-son oilaviy poliklinika binosini rekonstruksiya qilish ishlari boshlandi.

🔍 Deputat tanishuv jarayonida poliklinika binosining mavjud holatini ko‘zdan kechirdi va rejalashtirilgan qurilish ishlarini joyida o‘rgandi. Loyihaga ko‘ra, mavjud 50 qatnovli poliklinika o‘rniga yangi 50 qatnovli bino qurilishi rejalashtirilgan bo‘lib, u 1-tip oilaviy poliklinika sifatida zamonaviy sharoitlar bilan jihozlanadi.

📌 Rekonstruksiya ishlarining asosiy maqsadi — aholiga sifatli tibbiy xizmat ko‘rsatish, poliklinika imkoniyatlarini kengaytirish va qulay sharoit yaratishdir. Deputat qurilish jarayonining sifat va muddatini nazorat qilish bo‘yicha tavsiyalar berdi va loyiha ijrosini yaqindan kuzatib borishini ma’lum qildi.

💬 Shu bilan birga, yangi bino qurilishi hudud aholisi uchun qulay va samarali tibbiy xizmat ko‘rsatish tizimini yaratishga xizmat qiladi, shuningdek, mahalla infratuzilmasini rivojlantirish va zamonaviy sog‘liqni saqlash standartlariga moslashtirish imkonini beradi.

✅ Mazkur loyiha Ishtixon tumanida ijtimoiy infratuzilmani modernizatsiya qilish va aholining tibbiy xizmatlarga bo‘lgan ehtiyojini qondirishda muhim qadam sifatida baholanmoqda.