📢 Sherobod tumanida yangi o‘quv binosi va sport maydonchasi foydalanishga topshirildi

Sherobod tumani “Majnuntol” mahallasida joylashgan 68-sonli umumta’lim maktabida muhim ijtimoiy ahamiyatga ega loyiha muvaffaqiyatli yakunlandi.

O‘zbekiston Respublikasi Iqtisodiyot va moliya vazirligining “Openbudjet.uz” rasmiy platformasi orqali o‘tkazilgan SMS ovoz berish yakunlariga ko‘ra, mazkur tashabbus tumanda istiqomat qiluvchi fuqarolar tomonidan eng ko‘p ovoz to‘plab, g‘olib deb topilgan edi. Ushbu loyiha “Fuqarolar tashabbusi jamg‘armasi” mablag‘lari hisobidan moliyalashtirildi.

🏫 Natijada maktab hududida zamonaviy talablar asosida yangi o‘quv binosi barpo etilib, bolalar uchun qulay va xavfsiz sport maydonchasi qurib foydalanishga topshirildi. Yangi inshootlar o‘quvchilarning sifatli ta’lim olishi hamda sport bilan shug‘ullanishi uchun barcha zarur sharoitlarni yaratadi.

🎉 Ochilish marosimi tantanali ruhda o‘tkazilib, unda Xalq deputatlari Sherobod tumani Kengashining 10-Chag‘atoy saylov okrugidan saylangan deputati Q. Raxamov, mahalla faollari, ustozlar, ota-onalar hamda keng jamoatchilik vakillari ishtirok etdilar.

💬 Tadbir davomida so‘zga chiqqanlar bunday tashabbuslar aholining faol ishtiroki orqali hududlarni yanada obod qilish, ta’lim sifatini oshirish va yosh avlod uchun munosib sharoitlar yaratishda muhim ahamiyat kasb etishini alohida ta’kidladilar.