Xalq deputatlari Qo‘qon shahar Kengashi deputati A.Mamatkulov tomonidan yuborilgan deputatlik so‘rovi yuzasidan Qo‘qon shahar “Inson” ijtimoiy xizmatlar markazi tomonidan rasmiy ma’lumot taqdim etildi.

Taqdim etilgan ma’lumotlarga ko‘ra, “Muqimiy” va “Shikorbegi” mahalla fuqarolar yig‘inlarida aholini ijtimoiy qo‘llab-quvvatlash, nogironligi bo‘lgan shaxslarni reabilitatsiya vositalari bilan ta’minlash, bolalarni ijtimoiy himoya qilish hamda kam ta’minlangan oilalarga manzilli yordam ko‘rsatish borasida qator amaliy ishlar amalga oshirilgan.

Xususan, nogironligi bo‘lgan fuqarolarga elektr yuritmali va oddiy nogironlik aravachalari, eshitish moslamalari, qo‘ltiq-tayoqlar, protez-ortopediya vositalari hamda boshqa reabilitatsiya texnik vositalari yetkazib berilgan. Natijada 14 nafar nogironligi bo‘lgan shaxsning doimiy bandligi ta’minlanib, ularning ijtimoiylashuviga ko‘maklashilgan.

Shuningdek, bolalarni ijtimoiy himoya qilish yo‘nalishida yetim va ota-ona qaramog‘idan mahrum bo‘lgan bolalarni qo‘llab-quvvatlash, ularni uy-joy bilan ta’minlash, ta’lim va kasb-hunar imkoniyatlaridan foydalanishlari uchun zarur ko‘maklar ko‘rsatilgani ma’lum qilindi.

“Saxovat va ko‘mak” jamg‘armasi mablag‘lari hisobidan ehtiyojmand oilalarga oziq-ovqat, kiyim-kechak, davolanish va uy-joyni ta’mirlash uchun moddiy yordamlar ajratilgan. Bundan tashqari, ijtimoiy nafaqa va boshqa ijtimoiy xizmatlardan foydalanish uchun fuqarolarning murojaatlari qabul qilinib, tegishli tartibda ko‘rib chiqilmoqda.

Mazkur masala deputat nazoratida bo‘lib, aholini ijtimoiy qo‘llab-quvvatlash borasidagi ishlar yuzasidan monitoring davom ettiriladi.

Xalq deputatlari Qo‘qon shahar Kengashi