Xalq deputatlari Jondor tumani Kengashi kotibiyati mudiri, deputat I.Xolovga bir guruh fuqarolar tomonidan 3-davlat maktabgacha ta’lim tashkilotida bolalar uchun yaratilgan shart-sharoitlar yuzasidan murojaat kelib tushdi.
⚡️Murojaatda mazkur maktabgacha ta’lim tashkilotida tarbiyalanuvchilarning jismoniy tarbiya bilan shug‘ullanishi hamda bo‘sh vaqtlarini mazmunli tashkil etish uchun mo‘ljallangan sport maydonchasi va ayvon (besedka) mavjud emasligi bildirilib, ushbu muammoni bartaraf etishda amaliy yordam so‘ralgan.
⚡️Mazkur murojaatni joyiga chiqqan holda o‘rgangan deputat I.Xolov bolalar uchun munosib va xavfsiz shart-sharoitlar yaratish muhim ahamiyatga ega ekanligini ta’kidladi. Shuningdek, tarbiyalanuvchilarning jismoniy faolligini oshirish, ularning sog‘lom va barkamol voyaga yetishida sport maydonchasi hamda dam olish hududlarining ahamiyati katta ekanini qayd etdi.
⚡️Ushbu masalaga ijobiy yechim topish maqsadida deputat tomonidan Jondor tumani hokimining birinchi o‘rinbosari U.Fayzulloyev nomiga deputat so‘rovi yuborilib, 3-DMTT hududida sport maydonchasi hamda ayvon qurish bo‘yicha amaliy choralar ko‘rish so‘raldi.
⚡️Fuqarolar murojaatlarini o‘rganish va aholini qiynayotgan muammolarni hal etish yuzasidan amaliy ishlar davom etmoqda.