Ózbekstan Respublikası Prezidenti tárepinen "Jergilikli
mámleketlik hákimiyat wákillikli uyımlarınıń jumısın 2030-jılǵa shekem
rawajlandırıw koncepciyası" haqqındaǵı PP orınlanıwın támiyinlew hám
"Kúshli Keńes, esap beriwshi hám intaker hákim" principin ámeliyatqa
engiziw maqsetinde "Jergilikli mámleketlik hákimiyat haqqında"ǵı
Ózbekstan Respublikası Nızamına ózgerisler hám qosımshalar kirgiziw
haqqında"ǵı Nızam kórip shıǵıldı. 

Atap ótilgenindey, Jańa Ózbekstanda xalıq hákimiyatın tolıq
ámelge asırıw hám mámleketlik basqarıwda jergilikli mámleketlik hákimiyat
wákillik uyımlarınıń rolin arttırıw reformalardıń tiykarǵı baǵdarı esaplanadı.
Keyingi jıllarda jergilikli Keńeslerdiń aymaqlardı sociallıq-ekonomikalıq
rawajlandırıw hám xalıqtı táshwishke salıp atırǵan mashqalalardı sheshiw
boyınsha wákillikleri barǵan sayın keńeyip barmaqta. 

Bul nızam menen jergilikli wákillikli uyımlardıń jumısında
basqarıwdı sistemalı shólkemlestiriw hám atqarıw hákimiyatı ústinen
parlamentlik qadaǵalawdıń aymaqlıq túrlerin jetilistiriwge qaratılǵan bir qatar
ózgerisler kirgizilmekte. 

Atap aytqanda, xalıq deputatları jergilikli Keńeslerinde
Keńes baslıǵınıń orınbasarı institutı engizilmekte. Itibarlı tárepi, bul
lawazımdaǵı shaxs bir waqıttıń ózinde Keńes sekretariatınıń baslıǵı
wákilliklerin de ámelge asıradı. Oǵan sekretariat xızmetkerlerin lawazımǵa
tayınlaw hám azat etiw wákilliginiń beriliwi Keńes apparatınıń jergilikli
atqarıw hákimiyatınan tolıq biyǵárez bolıwın támiyinleydi.

A.Kamalov. hakim. rayonliq kenes deputati