Xalq deputatlari Qo‘qon shahar Kengashi deputati R.Talipdjanov tomonidan “Navro‘z” mahallasi jamoatchilik faollari ishtirokida mahalla infratuzilmasini yaxshilash, hududni obodonlashtirish hamda sanitariya talablariga rioya etish masalalariga bag‘ishlangan uchrashuv o‘tkazildi.

Uchrashuv davomida mahallada olib borilayotgan obodonlashtirish ishlari, tozalikni ta’minlash, chiqindilarni belgilangan tartibda yig‘ish va olib chiqish, ko‘chalarni tartibli saqlash hamda aholi uchun yanada qulay yashash sharoitlarini yaratish yuzasidan amalga oshirilayotgan ishlar muhokama qilindi.

Shuningdek, hududdagi mavjud infratuzilma holati, sanitariya qoidalariga amal qilinishi, ekologik muhitni yaxshilash hamda jamoatchilik nazoratini kuchaytirish masalalariga ham alohida e’tibor qaratildi.

O‘rganishlar davomida aniqlangan ayrim kamchiliklar yuzasidan mutasaddilar tomonidan tegishli tavsiyalar berilib, mavjud muammolarni qisqa muddatlarda bartaraf etish bo‘yicha vazifalar belgilab olindi.

Tadbir davomida mahalla faollari va fuqarolar bilan ochiq muloqot o‘tkazilib, hududni yanada obod va fayzli maskanga aylantirish bo‘yicha taklif va mulohazalar tinglandi.

Ta’kidlanganidek, mahallalarda obodonlashtirish va sanitariya holatini yaxshilash borasidagi ishlarni tizimli davom ettirish aholi uchun sog‘lom va qulay yashash muhitini yaratishda muhim ahamiyat kasb etadi.

Xalq deputatlari Qo‘qon shahar Kengashi