O‘ZLIDEP tomonidan izchil amalga oshirib kelinayotgan “Bugunning tadbirkor ayoli” loyihasi doirasida Toyloq tuman Kengashi apparat rahbari Zoyirjon Ziyodullayev hamda tuman Kengashi deputati Nasiba Mo‘minova Adas mahallasida istiqomat qiluvchi faol tadbirkor ayol — Mavjuda Salimova xonadonida bo‘lishdi. 

📌Mazkur uchrashuvda mahallada xotin-qizlar tadbirkorligini qo‘llab-quvvatlash, ularning mehnat faoliyati bilan yaqindan tanishish hamda tajribalarni ommalashtirish maqsadida tashkil etildi. 

 📌Mavjuda Salimova bugungi kunda ko‘rpa va ko‘rpacha astarlarini tikib, bozorga chiqarishni yo‘lga qo‘ygan. Shuningdek, mahalla fuqarolaridan tushayotgan buyurtmalar asosida tikuvchilik ishlarini ham samarali tashkil etgan. E’tiborli jihati shundaki, u o‘z tadbirkorlik faoliyatiga qizi va kelinini jalb etgan holda, oilaviy biznesni rivojlantirib kelmoqda. 

 📌Natijada, tadbirkor ayol o‘rtacha oyiga 5–6 million so‘m atrofida daromad olishga erishmoqda. Bu esa nafaqat oila farovonligini ta’minlamoqda, balki mahallada boshqa xotin-qizlar uchun ham ibrat maktabi bo‘lib xizmat qilmoqda. 

 📌Uchrashuv davomida ta’kidlanganidek, bugungi kunda davlatimiz tomonidan xotin-qizlar tadbirkorligini rivojlantirish, ularga imtiyoz va yengilliklar yaratish borasida keng ko‘lamli ishlar amalga oshirilmoqda. Ana shunday imkoniyatlardan unumli foydalanayotgan Mavjuda opa kabi tadbirkorlar bu islohotlardan mamnun ekanini bildirishmoqda. 

 📌“Bugunning tadbirkor ayoli” loyihasi ayollarning o‘z salohiyatiga ishonishi, mehnati orqali oilasi va jamiyat farovonligiga hissa qo‘shishiga xizmat qilayotgani bilan ahamiyatlidir. Adas mahallasidan boshlangan bu kabi tashabbuslar yurtimizda ayollar tadbirkorligining yangi qirralarini ochib berayotgani shubhasiz. 

Tuman Kengashi deputati

N.Muminova