Termiz shahrida aholi bandligini ta’minlash, oilalar daromadini oshirish va kambag‘allikni qisqartirishga qaratilgan amaliy ishlar, aholi bilan ochiq muloqot hamda manzilli yondashuv asosida izchil davom ettirilmoqda.

Xalq deputatlari Termiz shahar Kengashi raisi, 9-“Abdulla Avloniy” saylov okrugi deputati D.Normuradova, Kengash kotibiyati mudiri A.Ashurov hamda kotibiyat bosh mutaxassisi A.Temirovlar “Farxod” mahallasida bo‘lib, “mahalla yettiligi” a’zolari bilan uchrashdilar.

Muloqot davomida mahalladagi mavjud ijtimoiy-iqtisodiy holat, ishsiz va kam daromadli oilalar bilan ishlash, aholi bandligini ta’minlash hamda oilalarning barqaror daromad manbalarini yaratish masalalari atroflicha muhokama qilindi.
Asosiy e’tibor — aniq natija va manzilli yondashuvga

Yig‘ilishda “Farxod” mahallasida bandlik va kambag‘allikni qisqartirish borasida quyidagi ustuvor vazifalar belgilandi:

“Xonadonbay” o‘rganish — ishsiz va kam daromadli fuqarolar xonadonma-xonadon o‘rganilib, ularning muammolari, ehtiyojlari va mavjud imkoniyatlari aniqlanadi;

Bandlikni ta’minlash — ishsiz fuqarolarni, ayniqsa, yoshlar va xotin-qizlarni doimiy ish o‘rinlariga joylashtirish, talab yuqori bo‘lgan kasb-hunarlarga o‘qitish choralari kuchaytiriladi;

Tadbirkorlikni qo‘llab-quvvatlash — tadbirkorlik qilish istagidagi fuqarolarga hokim yordamchisi tavsiyasi asosida imtiyozli kredit va boshqa imkoniyatlardan foydalanishda amaliy ko‘mak ko‘rsatiladi;

Barqaror daromad manbai yaratish — har bir ehtiyojmand oilaning mavjud imkoniyatlaridan kelib chiqib, uni kambag‘allikdan chiqarishga qaratilgan individual yondashuv asosida ish olib boriladi;

“Mahalla yettiligi” hamkorligi — mas’ul tashkilotlar, mahalla faollari va deputatlar hamkorligida belgilangan vazifalar ijrosi muntazam nazorat qilib boriladi.

Yig‘ilish yakunida belgilangan vazifalarni o‘z vaqtida va sifatli amalga oshirish, har bir murojaat va muammoni e’tibordan chetda qoldirmaslik yuzasidan mahalla mas’ullariga tegishli topshiriq va deputatlik tavsiyalari berildi.

Aholi bandligi — oilalar daromadi — farovon mahalla!

Bu yo‘nalishdagi ishlar deputatlik nazorati asosida izchil davom ettiriladi.