665-сонли қарор ижроси юзасидан сессияда ҳисобот берилди
Халқ депутатлари Янгиқўрғон тумани Кенгашининг навбатдаги сессиясида Ўзбекистон Республикаси Вазирлар Маҳкамасининг 2024 йил 11 октябрдаги 665-сонли қарори ижроси муҳокама қилинди.
Мазкур масала юзасидан туман ҳокимининг ўринбосари ҳисобот берди. Унда туман Ободонлаштириш бошқармасига қўшимча 6 та штат бирлиги ва ички йўлларни таъмирлаш учун 4 та махсус техника ажратилгани маълум қилинди.
Шунингдек, маҳаллалардаги ички кўчаларни жорий таъмирлаш учун республика бюджетидан 4 миллиард 400 миллион сўм маблағ йўналтирилган.
Ҳисоботга кўра, йилнинг биринчи ярмида 8 та маҳаллада жами 10,2 километр ички йўл шағаллаштирилди. Шунингдек, Навкент, Истиқбол, Ғайрат, Салмон ва Қорасув маҳаллаларидаги мавжуд асфальт йўлларни жорий таъмирлаш ишлари амалга оширилди.
Йилнинг иккинчи ярмида Боғистон, Соҳил, Поромон, Нов ва Янгиобод маҳаллаларида жами 20,7 километр ички йўлни шағаллаштириш режалаштирилган. Бундан ташқари, Заркент, Маданият ва Бешбулоқ маҳаллаларидаги 4,4 километр асфальт йўлни жорий таъмирлаш ва асфальтлаш ишлари амалга оширилиши белгиланган.
Сессияда депутатлар томонидан бажарилган ишлар, ажратилган маблағларнинг мақсадли сарфланиши ва режалаштирилган лойиҳаларнинг ижроси юзасидан саволлар берилди ҳамда тегишли таклифлар билдирилди.
Муҳокама якунида ички йўлларни таъмирлаш ишларининг сифатини таъминлаш, маблағлардан самарали фойдаланиш ва белгиланган вазифаларни ўз муддатида бажариш бўйича масъулларга тегишли кўрсатмалар берилди.