Xalıq deputatları Qaraózek rayonlıq Keńesi sekretariatı baslıǵı, deputat Q.Jaqsımuratov Respublika ruwxıylıq hám aǵartıwshılıq orayı rayonlıq bólimi jetekshi  qánigesi M.Paluaniyazov penen birgelikte rayondaǵı ulıwma orta bilim beriw mekteplerinde jańa oqıw jılına tayarlıq jumısların arnawlı sorawnama tiykarında úyrenip shıqtı.  

Akademik Sabır Kamalov APJ aymaǵındaǵı 27-sanlı mektepte  ǵárezsizlik bayramın múnásip belgilew baǵdarında jumıslar barısı hám jańa oqıw jılına tayarlıǵı úyrenildi. 27-sanlı mektep 180 orınlıq bolıp, búgingi kúnde 109 oqıwshı qamtılǵan. Jámi pedagoglar sanı 24, sonnan joqarı kategoriyalı 3, birinshi kategoriyalı 7, ekinshi kategoriyalı 11 hám 3 qánige muǵallimler jumıs alıp barmaqta.
Mektep átirapı ǵárezsizlik bayramı hám jańa oqıw jılına baǵıshlanǵan kórgizbeli stendler, bezewler menen bezetilgen bolıp, aymaǵı abadanlastırılǵan hám miyweli, kórkem terek nálleri, gúller egilgen. Klass xanalar,  bayramǵa múnásip bezekler menen bezetilip, ishki xanalarda oqıwshılar ushın qolaylı sharayat, imkaniyatlar jaratılǵan.