Xalq deputatlari Qo‘qon shahar Kengashi deputati A.Mamatqulov tomonidan o‘z saylov okrugi hududida joylashgan “Shikorbegi” mahalla fuqarolar yig‘inida barpo etilayotgan tekstil fabrikasi qurilish ishlari joyiga chiqib o‘rganildi.

O‘rganish davomida qurilish jarayonlarining borishi, obyektning belgilangan muddatlarda foydalanishga topshirilishi hamda ishlab chiqarishni yo‘lga qo‘yish bo‘yicha amalga oshirilayotgan ishlar bilan yaqindan tanishildi.

Ma’lum qilinishicha, mazkur investitsiya loyihasini joriy yilning sentyabr oyida ishga tushirish rejalashtirilgan bo‘lib, natijada 300 ta yangi ish o‘rni yaratilishi ko‘zda tutilgan.

Deputat loyiha menejeri A.Mamadaliyev bilan suhbat o‘tkazib, qurilish ishlarining bugungi holati, ishlab chiqarish quvvatlarini ishga tushirishga tayyorgarlik hamda korxonani zarur muhandislik-kommunikatsiya tarmoqlari bilan ta’minlash masalalarini muhokama qildi.

O‘rganish yakunida loyihaning belgilangan muddatlarda sifatli yakunlanishi, yangi ish o‘rinlarini o‘z vaqtida yaratish hamda korxonaning barqaror faoliyatini yo‘lga qo‘yish yuzasidan tegishli tavsiyalar berildi.

Xalq deputatlari Qo‘qon shahar Kengashi