O‘zbekiston Respublikasi Oliy Majlisi Senati a’zosi Ulug‘bek Fayziyev Qiziltepa tumaniga tashrifi jarayonida tuman hududida saqlanib qolgan Buxoroning V-VI asrlardagi chegaralarini aniqlab beruvchi yagona inshoot sifatida qadrlanadigan Kanpirak devori holati bilan tanishdi.

Jarayonda ushbu noyob yodgorlikni kelgusi avlod uchun ham saqlab qolish bo‘yicha ishlar amalga oshirilishi, uning xalqaro M-37 yo‘li yoqasida joylashganligining inobatga olib, Samarqand-Buxoro turistik yo‘nalishlaridagi turistik manzil sifatida kiritish, atrofini o‘rib, muhofaza qilish bo‘yicha tavsiyalar berildi va senatorlik so‘rovi yo‘llash bo‘yicha kelishib olindi.

Ma’lumot uchun: hozirgi paytda O‘zbekiston tarixi fanida Kanpir devor (Devori kanpirak) atamasi O‘rta Osiyoda dehqonchilik vohalarini ko‘chmanchilar hujumidan himoya qilish maqsadida barpo etilgan mudofaa inshootlari tizimini anglatadi. «Kanpir devor» so‘zining ma’nosi qazilgan choh demakdir. Talaffuzda «n» bilan «m» almashuvi kuzatiladi. «Pir» bo‘g‘ini esa qadimgi payrya – aylana, o‘rov ma’nosida. Demak, kan(m)pir so‘zining o‘zi handaqli devor degani. Devor so‘zi kanpir so‘zining tub ma’nosi unutilganda qo‘shilgan.

Yodgorlik V-VI asrlarga oid bo‘lib tarixi aynan Eftaliylar davriga borib taqaladi.

Xalq deputatlari Qiziltepa tuman Kengashi kotibiyati